……من قاعة البرلمان إلى قاعة الأفراح.. والمناسبات…..
…………أين نواب الشعب من دورهم الدستوري ؟….
بقلم المواطن: عبده أحمد حسانين
في كل دورة برلمانية بنسمع نفس الجملة: النائب في خدمتكم بيسمع لطلباتكم- أقرب لمشاكلكم- جملة رنانة- بتتقال في الميكروفون قبل الانتخابات-وبتتكرر على صفحات السوشيال ميديا مع صورة النائب وهو بيقص شريط افتتاح جمعية خيرية- أو وهو قاعد في عزاء- كاميرا موبايل تصور
الصورة حلوة-واللقطة إنسانية- والتعليقات ربنا يخليك لينا يا سيادة النائب- لكن السؤال اللي محدش بيجاوب عليه: طيب وبعد الصورة؟ فين التشريع؟ فين الرقابة؟ فين السؤال للحكومة تحت القبة؟
لو دور النائب بقى حضور أفراح وسهرات قرآن وتوزيع زهور يبقى إحنا بنختار (منظم مناسبات)مش نائب تشريعي رقابي ودي الكارثة اللي بنعيشها من دورات
قبل ما نهاجم النواب نرجع للدستور المصري 2014، المادة 86 و 101 وما بعدها الدستور حدد وظيفتين أساسيتين لعضو مجلس النواب
النائب هو اللي بيحط القانون هو اللي بيراجع مشروعات القوانين اللي بتبعتها الحكومة-يعدل فيها- يرفضها- أو يوافق عليها كل قانون بيمس حياتك: قانون الضرائب- قانون المعاشات- قانون التعليم- قانون البناء-قانون المحليات… كله بيمر على إيده
دي الأخطر والأهم النائب من حقه يسأل الوزير-يستجوبه- يطلب إحاطة علمية-عن مشكلة- يقدم -طلب مناقشة عامة-وصولًا لـ (سحب الثقة)من وزير فاشل الرقابة يعني يحاسب الحكومة على الفلوس اللي بتتصرف على الخدمات اللي بتتقدم على المشاريع اللي بتتعطل
دول وظيفتين مفيش فيهم -يحضر فرح فلان’ ولا ‘يتصور مع أيتام الخدمات الشعبية دي شغل تطوعي”زيادة لكنها مش الأساس.
تعالى نشوف الواقع. افتح صفحة أي نائب على فيسبوك هتلاقي
ألبوم الأفراح: 50 صورة وهو بيرقص في فرح ابن فلان وعلان
ألبوم العزاء صورته وهو بيعزي لوشه حزين
ألبوم الجمعيات الخيرية وهو بيوزع شنط- بيفتتح حضانة- بيكرم حفظة قرآن وكل صورة عليها لوجو اسمه بخط كبير
ألبوم لقاء المواطنين: صورته وهو قاعد في مكتب_ وقدامه 3-4 مواطنين بيشتكوا-والكاميرا مصورة الزاوية اللي تطلع المكتب فخم
بوستات التهنئة عيد ميلاد فلان- نجاح علان- شفاء ترتان
جميل عمل إنساني لكن فين البوست اللي بيقول: قدمت طلب إحاطة لوزير الصحة عن نقص الدواء في المستشفى ؟ فين الفيديو وهو بيسأل وزير التموين عن سرقة الدقيق؟ فين صورة تقرير لجنة الخطة والموازنة وهو بيحاسب الحكومة على عجز الموازنة؟
السبب بسيط: الصورة بتجيب لايكات السؤال تحت القبة بيجيب عداوة مع الحكومة والنائب خايف يخسر الكرسي فاختار اللايكات.. على (الرقابة)
اسمع طلباتهم وأقرب مشاكلهم.. كلام غائب عن الحقيقة
النائب اللي يقول أنا قريب من الناس وبسمعهم لازم نسأله 3 أسئلة:
تسمع شكوى المواطن عن انقطاع المياه وبعدين تتصل برئيس الشركة طيب ده شغل عضو مجلس محلي أو سكرتير الوحدة مش محتاج حصانة برلمانية ولا راتب 40 ألف جنيه- أي مواطن عادي ممكن يتصل
السؤال الثاني: فين دورك التشريعي لمنع المشكلة؟
المياه بتقطع كل صيف بدل ما تسمع الشكوى كل سنة ليه ما قدمتش قانون يلزم وزارة الإسكان بجدول زمني للإحلال والتجديد؟ ليه ما استجوبتش الوزير عن مليارات الصرف الصحي اللي بتروح فين؟ سماع المشكلة إسعاف لكن التشريع علاج جذري
السؤال الثالث: فين الرقابة على الفلوس؟
موازنة الدولة 3 تريليون جنيه-النائب هو اللي بيوافق عليها بند فين النائب اللي طلع قال بند كذا في وزارة كذا فيه إهدار؟ فين اللي رفض بند زيادة الضرائب؟ كلهم بيرفعوا إيدهم ..موافقون.. وخلاص. الرقابة اتحولت لـ تصفيق
ليه النواب هربوا من التشريع والرقابة؟
الموضوع مش كسل شخصي بس فيه 4 أسباب
الناخب نفسه هو اللي صنع (نائب الخدمات) الناس بتنتخب اللي يمشي مصلحتي في المستشفى مش اللي يحط قانون يصلح المستشفيات كلهافالنائب بيلعب على الوتر ده يجيب لك تأشيرة علاج فتنتخبه 4 دورات حتى لو عمره ما اتكلم تحت القبة
ضعف الأداء البرلماني التشريع والرقابة عايزين مذاكرة عايزين تقرأ مشروع قانون 200 صفحة تفهم أرقام الموازنة تجهز سؤال للوزير ده مجهود ذهني أسهل بكتير تروح- فرح تتصور- تاخد واجبك-وتمشي
ضغط الحكومة والحزب
النائب التابع لحزب الأغلبية لو فكر يعمل استجواب لوزير- الحزب بيقوله (عيب، ده وزيرنا) فبيسكت ويكتفي بصور الأفراح الاستقلال البرلماني مفقود
القنوات بتجيب النائب وهو بيوزع بطاطين- مش وهو بيهاجم وزير فالنائب فهم القاعدة: اللي يتصور يكسب اللي يسأل يخسر
الكارثة: برلمان بلا برلمانيين
النتيجة إن عندنا برلمان خدمات مش برلمان تشريع القوانين بتطلع من الحكومة جاهزة والنواب يرفعوا إيدهم الحكومة تعمل اللي عايزاه ومحدش يحاسبها
– قانون الإيجارات القديمة بقاله سنين بيتناقش والنواب ساكتين
– قانون المحليات معطل من 10 سنين ومفيش نائب عمل ضغط حقي
– أسعار السلع بتولع-ومفيش طلب إحاطة جماعي لوزير التموين
– المستشفيات مفيهاش سراير- والنواب مشغولين بتكريم أوائل الثانوية
لما تغيب الرقابة-الفساد يكبر-لما يغيب التشريع-العشوائية تحكم
الحل: نرجع النائب لمكانه تحت القبة
المشكلة مش في شخص النائب المشكلة في المفهوم والحل يبدأ من 3 أطراف
يا سيادة النائب، الكرسي أمانة الناس انتخبتك عشان صوتها يوصل-مش عشان تتصور معاها- اعمل 70% شغلك الأساسي تشريع ورقابة و30% خدمات مش العكس لو قدمت قانون واحد مفيد في الدورة كلها الناس هتفتكرك أكتر من 1000 صورة فرح الشجاعة السياسية مطلوبة: اسأل، استجوب راقب حتى لو زعلت الحكومة ده دورك
يا مواطن بطل تنتخب بتاع الخدمات الشخصية اسأل المرشح قبل ما تديه صوتك: قدمت كام قانون؟ عملت كام استجواب؟ موقفك إيه من قانون كذا؟ اللي هيقولك أنا بتاع الغلابة قوله الغلابة عايزين قانون معاش محترم مش شنطة رمضان صوتك أمانة متضيعهوش على واحد بتاع كاميرا
بطلوا تلميع نائب الأفراح هاتوا النائب اللي قدم مشروع قانون واعملوا معاه حوار عن التشريع خلوا المعيار هو الأداء البرلماني مش عدد الصور لما الناس تعرف إن النائب الشاطر هو اللي بيحاسب الحكومة الكل هيتغير
نريد نوابًا لا مصورين
يا سادة.مصر مش محتاجة 596 منظم حفلات في البرلمان مصر محتاجة 596 مشرع ورقيب محتاجة نواب يخافوا من ربنا قبل ما يخافوا من الحكومة- نواب فاهمين إن حضور الفرح سنةلكن “حضور الجلسة وسؤال الوزيرفرض
الصورة اللي عايزينها للنائب مش وهو ماسك مشروب في فرح لكن وهو ماسك دستور في إيده وبيقول للحكومة إنت غلطان الصورة اللي عايزينها وهو بيشرح للناس ليه رفض قانون الضرائب الجديد- مش وهو بيوزع كرتونة
اسمع طلباتهم؟ آه اسمع
أقرب لمشاكلهم؟آه اقرب
لكن بعد ما تسمع وتقرب ارجع القبة وحول الشكوى لقانون وحول الأزمة لاستجواب
غير كده يبقى احنا بنضحك على نفسنا وبنختار نجم سوشيال ميديا مش (نائب شعب )
#صوت_العقل_إرادة_الغد
#لاتفقدالامل_مادمت_حيأ