………ازدواجية معايير تحت قبة البرلمان……..
…..النواب يحاربون رخص البيض ويتجاهلون نار الأسعار….
….حملة النواب لرفع سعر البيض دفاع عن المربي الصغير ولا حماية لكبار المنتجين؟…..
بقلم النائب عبده أحمد حسانين
فجأة وبدون مقدمات صحي مجلس النواب فجأة ولعت الجلسات والتصريحات والطلبات الإحاطة.. مش عشان كيلو اللحمة وصل 450 جنيه ولا عشان المعاشات ولا عشان عدادات الكهرباء الكوديه ولا عشان المصالحات والمباني اللي بتتزال ولا حتى لما الفراخ البيضا كسرت حاجز 120 جنيه للكيلو كل ده عدى بهدوء وكأن جيوب المواطن كانت بنك مفتوح ومحدش حاسس
لكن أول ما سعر كرتونة البيض نزل وبدأ يتنفس المواطن الغلبان شوية قامت الدنيا نواب أفاضل طلعوا يطالبوا (برفع سعر كرتونة البيض) لحماية المنتج وضبط السوق.. طيب سؤال مباشر من المقصود؟ ومن وراء ذلك؟ ولمصلحة مين النواب دلوقتي بقوا حراس على سعر البيض بعد ما كانوا صم بكم عن باقي الأسعار؟ هل مجلس النواب بقى بيمارس دوره معكوس؟ ولا فيه مستفيد مستخبي ورا خوفه على المربي؟
لما كيلو اللحمة البلدي كسر الـ450 جنيه كان رد فعل المجلس إيه؟ ولا حاجة كام طلب إحاطة اتقدم؟ يتعدوا على صوابع اليد الواحدة وكام استجواب لوزير التموين أو الزراعة؟ صفر المواطن اللي دخله 4000 جنيه كان لازم يشتغل 4 أيام عشان يشتري كيلو لحمة لعياله مرة في الشهر محدش في القبة قال حرام ولا فين الرقابة ولا مين بيحتكر العلف؟
البانيه اللي كان أكلة الغلابة البديلة للحمة بقى رفاهية. الأم اللي عايزة تعمل بانيه لعيالها يوم الجمعة لقت نفسها محتاجة 400 جنيه عشان كيلو ون. برضه صمت لا لجنة زراعة اتحركت ولا لجنة خطة وموازنة سألت العلف غلي ليه؟ ولا حد استدعى اتحاد منتجي الدواجن
الفراخ كانت بروتين الفقيرلما وصلت 120 جنيه، البيوت كلها بطلت تشتريها إلا في المناسبات السوق السوداء للفراخ اشتغلت والتهريب زاد والمواطن بقى ياكل عيش وجبنة المجلس؟ كان مشغول بقوانين تانية وقوانين أهم.. من وجهة نظرهم
الخلاصة: وقت ما كان المواطن بيتكوي بنار الغلاء في اللحمة والفراخ والبانيه كان صوت النواب واطي وقت ما كان التاجر بيكسب 200% والمربي بيخسر محدش اتكلم عن تكلفة الإنتاج ولا ..سعر عادل
أول ما كرتونة البيض نزلت من 180 لـ65 جنيه وبدأت الأسرة المصرية تحس إن فيه حاجة في متناول إيدها قامت القيامة
تصريحات نارية: لازم نحمي المربي الصغيرالسعر الحالي بيخسر المزارع..لازم تدخل الدولة وتسعير عادلطلبات إحاطة بالجملة ومناقشات مستعجلة ودعوات لاجتماعات طارئة للجنة الزراعة
طيب ليه دلوقتي بالذات؟ إيه اللي اتغير؟ المواطن هو والتضخم هو والعلف لسه غالي الفرق الوحيد إن السلعة الوحيدة اللي المواطن قدر عليها بدأت ترخص فهل ده يزعل حد؟
لما تحصل حاجة بالشكل ده لازم نسأل: مين المستفيد؟
سوق البيض في مصر مش كله مربي صغير على السطح” فيه شركات عملاقة ومزارع متكاملة بتحط 2 مليون فرخة دول لما السعر ينزل، هامش ربحهم بيقل من 30% لـ10% لكن المربي الصغير اللي عنده 10 آلاف فرخة هو اللي بيقفل فعلًا فهل النواب بيتكلموا باسم المربي الصغير؟ ولا باسم الشركات الكبيرة اللي عندها لوبي قوي جوه المجلس؟ لما كيلو اللحمة غلي مستفيد واحد تاجر الجملة والمستورد الكبير محدش دافع عنه ليه البيض مختلف؟
سعر البيضة = سعر العلف + هامش المربي. العلف 70% من التكلفة لما سعر البيض ينزل، الضغط بيروح على تاجر العلف عشان ينزل السعر. فهل الحملة دي هدفها حماية المربي ولا حماية تاجر العلف- من الضغط؟ لو السعر فضل نازل- المستورد الكبير هيضطر يبيع العلف بسعر أقل وده يخسره فالأسهل إن سعر البيض يطلع تاني
نرجع للدستور: النائب ممثل للشعب مش ممثل لشركته أو لمصنعه لكن الواقع بيقول إن فيه نواب عندهم مزارع دواجن ونواب شركاء في مصانع أعلاف ونواب وكلاء لشركات أدوية بيطرية هل صدفة إن أكتر ناس بتطالب برفع سعر البيض هما نفس النواب اللي عندهم استثمارات في القطاع؟ فين الإفصاح عن تضارب المصالح؟
اللحمة بـ450 جنيه مبتوجعش غير 20% من الشعب اللي بيشتروها البانيه بـ270 جنيه مبتوجعش غير الطبقة المتوسطة لكن البيض؟ البيض بياكل منه الغني قبل الفقير البيض فطار وعشاء البيض بروتين رخيص للطالب وللعامل وللموظف
يعني كرتونة البيض لما ترخص دي ضربة مباشرة لكل تاجر كان بيكسب من غلاء البروتين ضربة لكل واحد عايز المواطن يفضل محبوس بين اللحمة الغالية والفراخ الغالية فميبقاش قدامه غير الجبنة والفول لما البيض يبقى في متناول الإيد المواطن بقى عنده بديل.. وده يخوف ناس كتير.
عشان كده الضجة دي كلها مش خوف على المربي خوف على احتكار السوق
دور مجلس النواب في الدستور واضح: تشريع ورقابة الرقابة يعني تسأل الحكومة ليه اللحمة غليت؟فين أزمة العلف؟مين بيحتكر؟
لكن اللي بنشوفه دلوقتي هو العكس:
وقت الغلاء = صمت وده دور الحكومة مش دور المجلس
وقت الرخص = ضجيج وده دور تاجر الجملة مش دور النائب
النائب المفروض صوته مع الغلبان. المفروض يفرح لما سعر سلعة أساسية تنزل المفروض يقول الحمد لله المواطن ارتح شوية
مش أول واحد يجري يقول ..لأ ارفعوا السعر تاني
لما المجلس يسكت على 450 جنيه لحمة ويصحى علىج65 جنيه بيض يبقى فيه حاجة غلط في البوصلة يبقى المجلس مش بيمثل الشارع بيمثل اللوبي
دوركم مع الناس مش على الناس احنا انتخبناكم عشان تدافعوا عننا لما السعر يغلى مش عشان تدافعوا عن السعر لما ينزل خليكم في صف المواطن حتى لو زعل التاجر
فلو النواب شايفين إن دورهم دلوقتي هو رفع سعر البيض يبقى لازم احنا كشعب نسأل: طيب مين هيرفع صوتنا احنا؟
يا سادة النواب التاريخ بيسجل سجل صمتكم على 450 جنيه لحمةوسجل صحوتكم على 65 جنيه بيض والشعب مش بينسى
قبل ما تطالبوا برفع سعر كرتونة البيض انزلوا الشارع واسألوا أم عندها 3 عيال تحبي البيض يغلى ولا يرخص؟ الإجابة هتعرفكم مين المستفيد الحقي ومين اللي المجلس المفروض يمثله
#البيضة_أمانة_فاتقواالله_في_أمانةالناس
#صوت_العقل_إرادة_الغد
#لاتفقدالامل_مادمت_حيأ
#النائب_عبده_احمدحسانين
