….دار الأيتام بين الرعاية والإهمال.. من المسؤول؟….
……… وزارة التضامن_الجمعيات_المجتمع……………
…..السبحة في اليد والنار في الدار.. من يحمي أيتامنا ؟…..
بقلم النائب: عبده أحمد حسانين
الدار مش مجرد أربع حيطان ولمبة سهاري الدار المفروض تكون البيت البديل-للطفل اللي فقد أهله أو اتخلى عنه الزمن لكن لما نسمع كل شوية عن حريقة في دار أيتام_ أو إهمال_ أو دار شغالة بدون ترخيص- بنسأل نفس السؤال: فين الدولة؟ فين المجتمع؟ وفين الرحمة؟
موضوع دور الأيتام في مصر مش قضية خيرية وبس دي قضية أمن قومي وإنساني- طفل النهاردة هو مواطن بكرة- لو طلع سوي هيبني-ولو طلع مكسور هينكسر بيه البلد كلها
وفقاً لوزارة التضامن الاجتماعي- عدد دور الرعاية الاجتماعية للأطفال في مصر يتجاوز 450 دار- منهم دور حكومية ودور أهلية تابعة لجمعيات
العدد ده كبير-بس المشكلة مش في العدد- المشكلة في الجودة
دار متصممة لـ 30 طفل تلاقي فيها 80- تخيل أوضة نوم فيها 15 سرير
المشرفة اللي المفروض ترعى 5 أطفال بتشيل 20- طبيعي تنهار وتقصر
أغلب الدور الأهلية معتمدة على التبرعات الموسمية في رمضان باقي السنة ماشية بالعافية
الإهمال مش لازم يكون ضرب. الإهمال ليه 100 وش:
طفل تعبان وبياخد دوا غلط- أو مفيش متابعة طبية دورية
أطفال كبار مش بيعرفوا يقروا ويكتبوا- محدش بيتابع مذاكرتهم
معاملة بعنف- أو برود- أو تفرقة- الطفل بيطلع فاقد الثقة في الدنيا كلها
وده الأخطر دار مفيهاش طفايات حريق-أبواب مقفلة بجنزير- أسلاك كهربا عريانة
السبب الأول الفلوس-الجمعية اللي ميزانيتها 50 ألف في الشهر وعندها 60 طفل هتأكلهم ايه؟
ناس كتير فاتحة دار (لله) بس معندهاش خبرة إدارة ولا تعامل مع أطفال
غياب الرقابة- التفتيش المفروض كل 3 شهور-بيجي كل سنة وبيعدي بالحب
من المسؤول؟ دايرة مغلقة؟
وزارة التضامن الاجتماعي هي المسؤولة الأولى والمرخصة والمراقبة- عليها توفير دعم مادي وفني وتفتيش صارم-القانون بيلزمها بسحب الترخيص فوراً لو في مخالفة
الجمعية / مجلس الإدارة: دول اللي ماسكين الدار-عليهم توفير بيئة آمنة- وتعيين ناس مؤهلة-وصرف الفلوس في مكانها- أي تقصير منهم جريمة
المجتمع المحلي: الجار اللي شايف الدار مقفلة على العيال وساكت- المتبرع اللي بيدي فلوس ومش بيسأل راحت فين
الدولة ككل: لازم يبقى في بدائل- ليه مفيش نظام (أسر بديلة) قوي؟ ليه بنرمي 100 طفل في مكان واحد ونقول دي رعاية؟
الحقيقة إن المسؤولية تضامنية-لما تقع الدار- الكل بيقع معاها
والأخطر الدار اللي كان معاها ترخيص وانتهى
القانون بيقول: لو الترخيص انتهى لازم تقفل فوراً أو تجدد لكن اللي بيحصل إن صاحب الدار بيكمل شغل وبيقول (بجدد) وفي النص العيال موجودة
لما بتحصل حريقة أو مصيبة بنكتشف إن الترخيص منتهي من 5 سنين ومحدش سأل
دي جريمة كاملة الأركان- لأنك حطيت أطفال تحت مسؤوليتك بدون أي غطاء قانوني
للأسف معظم حرائق دور الأيتام مش قضاء وقدر-دي إهمال متراكم
التحميل الزائد على الكهربا*: 50 مروحة ودفاية وسخان على سلك واحد قديم. النتيجة شرارة وحريقة
عدم وجود وسائل أمان: مفيش طفايات- مفيش إنذار حريق- أبواب الهروب مقفلة عشان (العيال متطلعش)
المواد سريعة الاشتعال: مراتب سفنج- ستاير- ألعاب بلاستيك- النار بتمسك في ثواني
النتيجة طفل نايم بيصحى يلاقي نفسه محاصر- كارثة بتوجع قلب مصر كلها
نقطة محدش بيتكلم فيها بس هي أساس المشكلة الأرض ملك مين؟؟
3 أنواع لأرض دور الأيتام:
1أرض ملك للدولة ومتسلمة للجمعية حق انتفاع
: دي أأمن حاجة.بس الدولة ساعات بتسحبها
2أرض إيجار: صاحب البيت ممكن يطلع الجمعية في أي وقت فتلاقي الدار بتتنقل كل سنتين والأطفال بتتبهدل
3أرض ملك للجمعية: ودي قليلة ومحتاجة تبرعات ضخمة
المشكلة إن في جمعيات بتبني على أرض زراعية أو أرض وضع يد عشان الفلوس مش مكفية فتيجي المحافظة تعمل إزالة يبقى الأطفال في الشارع
الحل؟ الدولة لازم تخصص أراضي في المدن الجديدة بسعر رمزي لدور الرعاية وتديها عقد 50 سنة عشان الجمعية تطمن وتصرف وتبني صح
7الحلول والمقترحات: نطلع من الدايرة دي ازاي؟
عشان منفضلش نعيط بعد كل كارثة لازم حلول جذرية
1رقابة إلكترونية: كل دار يبقى ليها كاميرات متوصلة بمديرية التضامن أي تجاوز يتجاب فوراً
2تسهيل الترخيص: شباك واحد للترخيص في أسبوعين واللي شغال بدون ترخيص يتقفل فوراً ويتحاسب
3دعم مالي ثابت: مش تبرعات ميزانية شهرية لكل طفل تكفي أكل وتعليم وعلاج
4تفعيل نظام الأسر البديلة: بدل 100 طفل في دار 100 أسرة تاخد طفل وتعيشه في بيت
على مستوى الجمعيات:
1إدارة محترفة: مش أي حد يفتح دار لازم شهادات في الإدارة والطفولة
2الشفافية: ميزانية الدار تنزل على صفحة كل شهر التبرع راح فين
3تدريب العاملين: المشرفة مش خدامة دي أم بديلة لازم تتدرب نفسياً وتربوياً
على مستوى المجتمع:
اتبرع بس اسأل- زور الدار- شوف العيال- متديش فلوسك لأي حد-اسأل عن الترخيص- لو شفت إهمال بلغ 16439 خط نجدة الطفل
اليتيم أمانة والنبي وصى بيه( أنا وكافل اليتيم في الجنة هكذا)
الإهمال في دار الأيتام مش غلطة موظف- ده خيانة أمانة
سواء الدار مرخصة أو لا- منتهية أو شغالة- في حريقة أو مفيش… في النهاية في طفل مستني اللي يحبه ويراعيه ويعلمه
مسؤولية الدار مش على التضامن لوحدها- مسؤوليتنا كلنا
لأن بكرة لما الطفل ده يكبر هيفتكر مين كان جنبه ومين سابه
لو كل واحد فينا شال جزء من المسؤولية- هنقدر نقول بجد
[مصر بلا أيتام مهمشين]
#الأيتام_مسؤوليتنا_كلنا
#النائب_عبده_احمدحسانين
#الأمين_العام_لمحافظه_سوهاج
#حزب_الأحرارالدستوريين
#صوت_العقل_إرادة_الغد
